* السلام عليكم .. أهلا صاحبي .
مبروك عليك المزيود .. واش جابت مرتك ؟ طفل ولا طفلة ؟
* جاتني بنية .
* يسما أنا عندي سبع أولاد .. وأنت ولاو عندك سبع بنات ههههه .. الله يبارك ويزيد .
ومن يومها ولى ينادي صاحبه .. بو7 بنات .
دارت الأيام وعام ورا العام . كبرو الصغار وشاخو لكبار .
وفي يوم من ليام وبعد غياب طال . تلاقو لصحاب .
بو7أولاد : واش راك ياصاحبي .
بو7بنات : ولله الحمد .. واكل شارب .. متغطي ومدفي .. لبستي نظيفة وخطوتي خفيفة .
بو7أولاد : يظهر لي عاودت العرس يا شايب يا بو7بنات ؟ ههههه
بو7بنات : هههه لا يا صاحبي .. يخي عندي 7 بنات . كل يوم تجي لعندي بنية .. تفطرني وتعشيني . تلبسني وتعطرني .. تفرشلي وتغطيني . الله يباركلي فيهم وفي رجالهم . الله يصلح حالهم ويهنيهم .
بو7أولاد : آآآآه يالدنيا .. بو لبنات يبات متعشي وبو لولاد يبات بلا شي .
.
.
إذا كان الولد يحمل إسم أبيه ... فـ البنت تحمل أباها .
